2deo 2020 deialdia ebatzi da | Tabakalera - Donostia / San Sebastián
2020-06-26 10:15

2deo 2020 deialdia ebatzi da

Tabakalerako ikus-entzunezko edukien laborategiak 8 proiektu hautatu ditu, deialdian aurkeztutako 99en artean. Uztailetik aurrera, hautatutako pertsonek aholkularitza-programa bat eta 4.000 euro izango dituzte aurkeztutako proiektua preproduzitzeko. 

Tabakalera Kultura Garaikidearen Nazioarteko Zentroak, euskarazko ikus-entzunezko edukien 2deo laborategiaren bidez, 2deo 2020ko deialdia ebatzi du. Deialdian ia ehun proiektu aurkeztu ziren eta horien artean zortzi hautatu dituzte. 2deoren deialdiaren helburua ikus-entzunezko edukietan oinarritutako proiektuak garatu eta prototipatzea da; gainera, 2deoko arduradunen arabera, “hirugarren deialdian parte-hartze handia egon da, gehienbat hautagai gazteak izan ditugu eta euskaraz proposatutako edukiak; ondorioz, 2deoko laborategia finkatu egin da sormen-espazio gisa, eta Euskadiko egungo ikus-entzunezko sektorearen leiho garrantzitsu bihurtu da”.

 

Hautatutako proiektuak

Uztaila eta azaroa bitartean, 2deo laborategiak prestakuntza-saioak antolatuko ditu ikus-entzunezko proiektuak preproduzitzeko. Gainera, aholkularitza profesionala eskainiko du edukia kontatzeari, lan-prozesuei, proiektuak gauzatzeari eta jabetza intelektualari dagokienez. Hautatutako proiektu bakoitzak 4.000 euroko laguntza ekonomikoa izango du.

Honako hauek dira preprodukzio-fasean 2deo laborategian lan egiteko hautatutako proiektuak:

  • Patrimonio Virtual SL (Arkikus): Parallel V R Dantza, errealitate birtual paraleloko (PVR) app bat.
  • Euskal Wikilarien Elkartea: Ikusgela, euskarazko eduki pedagogikoen web-plataforma bat.
  • Kim Maiteny Munoa: Uroboros telesaila.
  • Jone Arriola: web bidezko Females saila.
  • Mirokutana Koop Elk. Txikia: Zapata Berriak telesaila.
  • La Traka Producciones: web bidezko Elizalde Zinema saila.
  • Carolina Cruz: web bidezko Zuzenean saila.
  • Pello Reparaz: Fatum bideoklip interaktiboa.

 

Prototipatzea, bigarren fasea

Hautagai bakoitzak mentoring programa bat izango du proiektua egiteko eta txosten bat aurkeztu beharko du. Azaroan aurkeztutako txosten guztiak aztertuko dira eta gehienez ere hiru proiektu hautatuko dira. Horiek bigarren fase batean sartuko dira, prototipatze-fasean. Bigarren faseak 2021eko urtarriletik maiatzera arteko iraupena izango du eta hautatutako proiektuen artean 50.000 euroko laguntza ekonomikoa banatuko da. Prozesuan sortutako prototipoaren aurkezpen publiko bat egingo da eta, horretarako, jendaurreko ekitaldi bat antolatuko da 2021eko maiatzean, 2deo ikus-entzunezkoen laborategian.

 

Web bidezko Pikuak sailak, 2deon burututakoak, ikaragarrizko arrakasta du Eitbn

Web bidezko Pikuak saila 2deoren 2018ko deialdian hautatu zen eta Tabakalerako laborategian gauzatu zen; gaur egun, arrakasta itzela du eitb.eus webgunean. Ekainaren 15ean estreinatu zen eta estreinaldiko astean, Maddi Castro Elosegik zuzendutako sailak 13 mila ikusle lortu ditu. Umore eta ahizpatasun kantitate handiak dituen web bidezko saila da eta, bertan, garrantzi handia dute familiak eta mugimendu feministak.